Walay lockdown sa palengke sa Davao City sumala ni Mayor Sara

Agdao Market
(File Photo from davaocity.gov.ph)

DAVAO CITY – Walay lockdown nga ipatuman sa mga palengke sa siyudad bisan pa man nga dunay mga nagpositibo sa COVID-19 sa mas gipakusgan nga  contact tracing ug surveillance swabbing.

Mao kini gipaklaro ni Mayor Sara Duterte human nga dunay walo ka tindera ug usa ka health worker ang na-test positive sa COVID-19 atol sa  “surveillance testing” sa Agdao Public Market di pa lang dugay.

Nasayran nga mokabat sa 300 ka tao ang gipa-ilawom sa RT-PCR test sa niaging semana.

”Dili siya rason sa pagkakaron. Ang atong economic lifeline we will open it until the very last minute kinahanglan na siyang isirado, that is not the first option para sa atoa sa pagkakaron,” pasabot ni Mayor Sara labot posibleng lockdown sa palengke.

Matod sa Mayor nga  nag unang option karon sa siyudad mao ang testing ug pagsiguro nga paspas ang contact tracing.

Hinuon ang tanang nag positibo sa Agdao palengke ang  puros kini  asymptomatic, apil na ang usa ka babaeng health worker sa Agdao Health Center kinsa nakadawat og first dose sa Sinovac vaccine di pa lang dugay.

Gumikan niini, dugang testing pa ang gipahigayon sa Agdao Palengke niadtong lunes dungan usab sa mga  tindera sa Bankerohan Public Market.

Gipasabot usab ni Mayor Sara kung nganong gipatuman ang surveillance testing sa pag-ingon, “so that maunahan nato ang mga clustering of cases, pananglitan kung wala ta naka surveillance sa Agdao palengke, kining 9 ka buok nga asymptomatic tungod wala man gyud silay gibati nga sintomas, they will go on  na ma-immerse didto sa palengke, sa panimalay, sa community and this will cause a spike or a surge kung dili siya makita dayun.” Busa mahimong direksyon sa pagpahigayon og surveillance swabbing ug testing matud sa Mayor,  “we will test as much as we can, so the challenge karon paunsa nato ma-convince ang mga tao nga magpa testing bisan wala silay sintomas.“

Hinuon malaumon ang Mayor nga makig-alayon ang katawhan sa health authorities nga mopailawom sa testing.  

Gilauman nga ipahigayon ang  matag adlaw nga surveillance testing sa mga high-risk area sa siyudad apil na business establishments sama sa pribadong buhatan, banko ug call centers.