TUPAD, KAAGAPAY gisugdan na sab sa Panabo, Tagum ug IGACOS

TUPAD, KAAGAPAY gisugdan na sab sa Panabo, Tagum ug IGACOS
Paglunsad sa TUPAD, KAAGAPAY para sa Pag-ayo sa Kinaiyahan Project sa Tagum ug Samal (Tagum photo (left) by PIO-Tagum and Samal photo (right) by Christian Juntong)

DAVAO DEL NORTE – Nagmalamposon ang sagunson nga paglunsad sa programang “TUPAD at KAAGAPAY Para sa Pag-ayo sa Kinaiyahan Project” sa Panabo, Tagum ug Island Garden City of Samal (IGACOS) di pa lang dugay.

Gipangunahan ni Davao del Norte Provincial Administrator Engr. Josie Jean Rabanoz isip representante ni Gobernador Edwin I. Jubahib ang paglunsad sa proyekto sa maong mga siyudad.

Sa Tagum City, mas gidugangan pa ang pagpanindot sa e-park pinaage sa pagtanom sa mga punoan nga mamulak ug makahatag og kabugnaw sa maong dapit.

Samtang sa IGACOS, kapin sa 200 ka mga apektadu sa pandemya ang naka benipisyo sa proyekto diin magtanom kini og punoan ug mangrove species sa maong Isla sulod sa napulo ka adlaw ug makadawat og sweldo nga tag P396.00 kada adlaw.

Susamang proyekto gisugdan na sab sa Panabo City diin 10,000 ka seedlings sa Gemelina maoy gitanom sa Mabunao, Panabo City.

Nasayran nga ang maong proyekto nasubay usab sa tinguha sa administrasyong Jubahib nga mas pakusgan pa ang reforestation sa walo ka munisipalidad ug tulo ka siyudad nga sakop sa probinsya.

Sa samang higayon, ang Tabang sa DOLE alang sa Disadvantaged & Displaced Workers nga programa tinguha usab nga mahatagan og trabaho ug sweldohan sa gobyerno ang mga nawad-an og trabaho karong panahon sa pandemya .

Mokabat sa 2,621 ka benepisyaryo sa DOLE TUPAD gikan sa tibuok probinsya.

Una niini , malamposon na usab nga nalunsad ang proyekto sa mga lungsod sa Kapalong, Santo Tomas, Carmen ug San Isidro atol sa unang semana sa Pebrero.