Taxpayers gipahinumduman sa ITR deadline karong April 15

BIR

DAVAO DEL NORTE – Dungan sa pahinumdum sa mga taxpayer nga deadline na sa April 15, 2021 sa pag-file og Income Tax Return (ITR), nagpatuman na usab karon og mga lakang ang Bureau of Internal Revenue (BIR) Revenue District Office (RDO) 112 aron hapsay nga mapahigayon ang transaksyon nga nagsunod sa health protocol.

Atol sa ‘Pakigsayod’ program adlawng myerkules (April 7) gibutyag  ni BIR Revenue District Officer, Mary Ann B. Cervantes nga usa sa mga lakang nga ilang gihimo mao ang hapsay nga pagpahiluna sa lugar asa mopahigayon og transaksyon ang taxpayers sa ilang buhatan sa kapitolyo.

Matud pa ni Cervantes nga ang buhatan sa RDO 112 pinaagi sa tabang ni Governor Edwin I. Jubahib, ang dunay maayong ventilated extension sa  taxpayer’s lounge nga nagtugot sa kapin 200 ka tao diin nagsunod gayud sa  social distancing.

Subay niini, dili na maghulat ang mga tao sa gawas ilawom sa kainit sa panahon sa takna nga mopahigayon og transactions.

Dugang niini, abli usab ang buhatan gikan lunes hantud sabado alang sa  mga taxpayers nga magbayad sa ilang ITR hangtud sa deadline nga April 15, 2021.

“Isa pa kung dili sila maka adto diha sa atong office, pwede pud sa atong mga authorized agent bank. Dili man sila mag abre ug sabado pero extended ang ilang banking hours to 5:00pm,” sumala ni Cervantes.

Samtang, alang usab sa mga tao  nga buot mag file online, mahimo usab kini  pinaagi sa E-BIR forms package diin ma-download sa www.bir.gov.ph  ug e-install sa inyong computer aron makapadayon na sa filing.

Giklaro ni Cervantes nga wala nay extension sa sa deadline of filing  diin hangtud lang gyud sa April 15.

Hinuon, kung dunay kausaban o kaha magpa-usab sa ilang gi-file nga ITR wala na kini penalty hangtud sa May 30, 2021.

Apan, kung  molampas na sa deadline, aduna nay penalty sama sa 25 percent surcharge, interest, ug compromise penalty.

Ang Bureau of Internal Revenue (BIR) Revenue District Officer 112 naglangkub sa mga taxpayer gikan sa mga probinsya sa Davao del Norte ug Davao de Oro.