Submarine cable projects dakong tabang sa paglambo sa turismo sa IGACOS

Si Island Garden City of Samal Mayor Al David Uy. Contributed Photo

Gibutyag ni Island Garden City of Samal (IGACOS ) Mayor Al David Uy nga dakong tabang alang kanila kung mahimo ng operational ang 14.7-kilometer submarine cable project sa Northern Davao Electric Cooperative (NORDECO) nga ipadagan sa isla. 

Sumala sa Mayor, makapakusog kini sa industriya sa turismo ug ilabi na mas dali na lamang sa mga stakeholders sa pag-expand sa ilang mga resorts, sulti sa opisyal atol sa interview kaniya sa media adlawng byernes, (April 30).


“Hopefully nga matinood na gyud na makaoperate na gyud sila by September kay nakita man nato nga naa na ang mga poste, concrete post pati tong mga tag-as kaau nilang poste so hopefully kay dakong tabang na siya kay isa pud na sa mga reklamo dili lang sa atong tourism stakeholders they cannot expand their resorts kay wala lagi kuryente kay kung walay kuryente wala puy tubig kambal mana diri so dakong tabang na so macorrect atong kuryente kung makaoperate na atong submarine cable,” dugang sulti sa Mayor. 

Ang proyekto nga 14.7 kilometros nga submarine cable nga adunay kapasidad nga magdala og 50MW (megawatt) nga mokonektar sa Barangay Aundanao sa IGACOS, padulong sa Pantukan grid.


Kahinumduman nga niadtong September 2019 gipahigayon ang ground breaking sa nasangpit nga proyekto apan naundang gumikan sa pandemyang COVID-19, butyag ni  NORDECO Inc. general manager Mario Angelo Sotto sa ulahing pakighinabi niini. 


“Kani ang atong problema, kitang tanan nag-antos niining pandemya, ug dapat gani nahuman na nato ni atong milabayng tuig. Nagmeeting nami sa mga Korean investors ug moanhi sila sa Hunyo o Hulyo ning tuig aron sa pagpahigauon og marine  survey, sulti ni Sotto. 


Ang PHP1.1-billion project lakip na niini ang  enhancement sa transmission ug linya sa kuryente sa tibuok isla nga mahimong makagenerate hangtud sa 50MW.

Samtang, ang IGACOS aduna lamang kinatibuk-ang 46 kabarangay, ug dunay total demand nga 10MW nga igong solusyon sa kakulangon sa suplay sa kuryente sa tibuok isla.