Senior Citizens sa DavOc giawhag nga magpalista para sa Covid-19 vaccination

Senior Citizens sa DavOc giawhag nga magpalista para sa Covid-19 vaccination
(Image gikan sa Davao Occidental LGU Facebook Page)

DAVAO OCCIDENTAL – Nanawagan si Prince Paraiso, ang Health Education Promotion Officer sa Provincial Health Office (PHO) sa Davao Occidental ubos sa programang, “Sulong, Davao Occidental!” nga kinahanglan nga magpalista una ang mga senior citizens sa tibuok Davao Occidental isip “Profiling” una magpahigayon og pagpabakuna ngadto kanila.

“Gikinahanglan makig-alayon na ang atoang mga senior citizens ngadto sa ilang mga Health Centers o Barangay Health Stations tungod kay sila na ang musunod pagkahuman sa atoang mga Medical Health practitioners, healthcare workers, ug frontliners sa bakuna batok sa COVID-19.” sulti ni Paraiso.

Ang PHO nag-awhag sa mga anak, kapamilya, paryente, silingan, ug kaila sa mga senior citizens nga ipasabot ngadto kanila ang kamahinungdanon nga magpabakuna sila tungod kay gina-konsidera sila nga “most vulnerable” nga matakdan niining COVID-19.

Nakatakda nga tapuson karung semanaha ang “Profiling” o pagpalista sa mga senior citizen nga buot magpabakuna.

Apan, kung magpabilin nga magdumili ang mga nahisgutan mamahimo na kini nga dili maprayoridad kun ugaling muabot na ang panahon nga buot na nilang magpabakuna.

Giawhag usab sa PHO ang mga taga Davao Occidental nga maminaw sa ilang tulumanong, “Sulong, Davao Occidental!” alang sa ilang mga pahibalo ug mamahimo usab silang motan-aw sa opisyal nga Facebook Page sa Provincial Health Office Davao Occidental, ug sa Davao Occidental Official Facebook Page sa probinsya.