Programang ‘Dangpanan ni Tomas’ mas gipalapdan, mas daghang pasyente ang natabangan

Sto. Tomas Davao del Norte
(Photo used for the graphics from Municipal Government of Santo Tomas, Davao del Norte Facebook Page)

DAVAO DEL NORTE – Taliwala sa nasinatiang pandemya nga dala sa COVID-19, gipalapdan sa lokal nga gobyerno sa Sto. Tomas, Davao del Norte ang ilang Programang “Dangpanan ni Tomas” o DNT diin tumong niining mahatagan og tabang pinansyal ug sosyal ang mga Tomasino nga nanginahanglan og tabang ug dunay mga balatian sama sa cancer ug dialysis patients.

Sumala ni Carlo Jack Pino, executive assistant II ug in charge sa Dangpanan program, matud pa niini dakong tabang kini nga programa nga gihimo ni Mayor Ernesto Evangelista ug daghanang Tomasino ang natabangan niini, ilabi na kadtong nanginahanglan og medikal ug pinansyal assistance gikan sa gobyerno. “Sukad nga gipalapdan sa Dangpanan ni Tomas ang ilang pagserbisyo diin lakip na niini ang cancer ug dialysis patients, maka-accommodate na kita og 60 ka pasyente, ug tungod niini nga programa, mas dali na ang pagpangayu ug tabang gikan sa Santo Tomas LGU,” sulti ni Pino.

Sa kasamtangan, ang DNT naga-cater sa 10 ka cancer patients nga gapailalom og chemotherapy ug 50 ka dialysis patients, asoy ni Pino.

Dugang pa niini mahimo usab nga ma-avail sa DNT ang zero-balance hospital bill, lakip na ang out-of-pocket expenditures ug food assistance alang sa mga indigent Tomasino.

Samtang, giawhag usab ni Municipal Administrator Atty. Elisa Evangelista-Lapina ang Sangguniang Bayan members nga iinstitutionalize ang Dangpanan ni Tomas isip programa nga direktang makabenipisyo sa mga kabus nga Tomasino.

“Aron masiguro nga ang programa sa DNT mapondohan, adunay panginahanglan alang sa Sangguniang Bayan nga i-institusyonal ang programa aron masiguro nga ang matag Tomasino maprotektahan batok kakulangon sa pinansyal ug aron mahatagan og tabang sa ilalum sa one-stop-shop”, sulti ni Lapina.

Giasoy ni Lapina nga kung mabuhatan og balaod ang DNT, mahimong igahin ang pondo alang sa pagpalapad sa operasyon niini.