PhilHealth nag-warning batok ‘fixers online’

PhilHealth nag-warning batok 'fixers online'
Mga contact nga mahimong isumbong kung dunay mga nangilad gamit ang pangalan sa PhilHealth. (Image gikan sa PhilHealth XI)

DAVAO CITY – Hugot nga nagpasidaan ang Philhealth Health Insurance Corporation (PHIC) kon PhilHealth XI batok mga ‘fixer’ kon mga nangilad online diin bag-ong modus nga gireport ngadto sa maong ahensya.

Gikumpirma ni PhilHealth Information Officer Johanna Blason sa pakighinabi kaniya sa News Fort nga nakadawat og report ang ilang buhatan gikan sa usa ka meimbro labot sa maong pagpangilad. 

“Naay na encounter nga fixers, naga post sa facebook nga mag print sila og member data record, mag assist sila sama sa  pag print of ID in the amount of 400 pesos,” sulti pa ni Blason.

Subay niini  gipahibalo ni Blason ngadto sa publiko ilabi na sa mga miembro nga tanang transaction sa ahensya libre ug walay bayad, gawas lang sa pagbayad og premium contribution. 

Matud pa ni Blason, “since na announce nato nga working na ang  PhilHealth member portal sa website nga www. Philhealth.gov.ph, mahimong i-click ang online services, sulod sa member inquiry ug maka view namo sa imong record, ug pwede na ma-download ug maka-print o kaha masave og kopya. ” 

Busa dili na angay pang makig-transak og fixers labi pa sa online  sanglit ang mga impormasyon personal ug  angayang ang miembro lang ang  dunay control niini.

Hinuon ang maong illegal nga binuhatan gipa-imbestigahan na sa PhilHealth ug gipasa na kini sa legal department aron masumpo ang matang sa pagpahimulos karong panahon sa pandemya. 

Sa karon panawagan ni Blason sa mga miembro nga mahimong moreport gilayon sa ahensya kung dunay mga mamatikdang pagpangilad ilabi na online.