‘PDITR strategy’ batok COVID-19 angay pakusgan sumala sa DOH XI

DAVAO CITY – Pagpakusog sa PDITR strategy kon Prevent, Detect, Isolate, Treat, Reintegrate, maoy hugot nga panawagan karon sa Department of Health (DOH XI) ngadto sa tanang kagamhanang local sa rehiyon.

Kini bisan pa man nga namatikdan na ang pagkunhod sa mga kaso sa COVID-19 sa pipila ka lugar sa rehiyon onse sa niaging mga adlaw o semana.  

Atol sa One Davao Virtual Presser sa Philippine Information Agency (PIA XI), gibutyag  ni Dr. Raquel Montejo kinsa operations chief sa DOH XI COVID-19 Vaccination Program nga kinahanglang dili mo-undang ang mga  probinsiya sa rehiyon sa pagpatuman sa  maong stretehiya .

Usa sa gidayeg  sa DOH XI ang pamaagi karon sa Davao City nga gipatuman ang hugot nga surveillance swab testing alang sa mga dunay gibating sintomas sa matag distrito o barangay sa siyudad. 

“Nangita sila ug mga symptomatics, gi-review nila ang mga records sa consultation. Ug ang tanang symptomatic dapat ma-test ,” sumala  ni Dr. Montejo.

Samtang, subay sa Regional Situation Update sa COVID-19 sa Davao Region kutob April 10, 2021, DOH Davao Center for Health Development nakatala og 99 ka bag-ong kaso sa COVID-19 diin sa karon miabot na sa 962 ang aktibong kaso sa rehiyon onse.

Sa mga bag-ong kaso, 45 gikan sa Davao City, 31 sa Davao del Norte, 10 sa  Davao del Sur, 7 sa Davao de Oro, ug 6 sa Davao Oriental.

Adunay duha ka namatay ug kini gikan tanan sa Davao City.

Subay niini, malaumon si Dr. Montejo nga mokunhod pa ang mga kaso sa  mosunod nga semana diin sa karon ang Davao region nakatala og 4 percent positivity rate itandi sa Metro Manila nga 20 percent positivity.

Gibutyag usab sa  DOH XI nga nagsugod na ang second dose sa vaccination niadtong April 5 alang sa A1 priority eligible kon health workers.

Gilauman nga mosunod na ang priority groups nga A2 kon mga senior citizens ug A3 kon mga taong dunay mga balatian.