Mt. Apo Natural Park planong butangan og ‘standard C.R.’

Mt. Apo Natural Park planong butangan og ‘standard C.R.’
Mt. Apo (Photo courtesy of DENR XI)

DAVAO CITY – Giplano karon sa Department of Environment and Natural Resources (DENR-XI) nga dugang mekanismo sa pagpakusog sa proteksyon sa Mt. Apo Natural Park (MANP) mao ang pagbutang og  ‘standard facilities‘ sama sa Comfort Rooms kon C.R.

Kini maoy usa sa mga lakang sa maong ahensya human nga daghang kalapasan sa kinaiyahan ang nadiskubrehan sa dihang mismong si DENR X1 Regional Executive Director (RED) Bagani Fidel A. Evasco ang misaka sa Mt. Apo di pa lang dugay.

Gibutyag ni DENR XI Information Officer Jayvee Agas atol sa pakighinabi kaniya sa NewsFort nga  gawas sa maong pasilidad, mas pahugtan pa usab ang polisiya sa  pagsaka sa Mt. Apo ug magbutang og dugang mga signages, o kaha bag-ohon ang mga daan na’ng mga pahibalo ug pakusgan ang  pag-patrolya sa maong lugar. Mao kini ang nahimong desisyon sa ahensya  human nga dili na idayon pa ang temporaryong pagpasira sa Mt. Apo Natural Park.

“Aside sa paghinlo o pag-rehabilitate kay pwede gihapon e-pursue ang  rehabilitation plan sa Mt. Apo even nga  dili  na ipasirado, ang LGU’s nag-assure pud sa amoa nga they will support sa mga rehabilitation plan sa PAMB.,” sumala ni Agas.

Gikumpirma ni  Agas nga nagpahigayon og emergency EnBanc meeting niadtong February 23, 2021 ang Protected Area Management Board (PAMB) nga gipanguhan sa DENR –RED aron hisgutan nga  i-oktaba una ang  pagsirado sa MANP.

Sa gihimong botohan, 25 ka miembro sa board gikan sa Region 11 ug 12 ang pabor nga dili una idayon ang pagsirado samtang walo ka miembro ang misupak. 

Una niini, nagpadayag na si DENR-RED Evasco kinsa chairman usab sa PAMB  nga temporaryong isirado ang MANP aron mapatuman ang rehabilitasyon ug dilli mosamot ang mga kalapasan sa kinaiyahan sa  maong protected areas.

Nasayran nga sagad sa mga kalapasan nga nakit-an mao ang  wala pagsunod sa mga trekkers sa IATF guidelines labot health protocols, daghang basura ang bisan asa lang gilabay, vandalism, duna pay nakitang hugaw sa tao, ug maka-alarma nga mga nakitang butang  nga nakadaot sulod sa Strict Protection Zone or SPZ.

Gipasabot ni Agas, “despite sa deferment, ang DENR, we will still pursue ang among strategic plans to improve the condition of Mt. Apo, siguro ang isa niini is to intensify the information drive about Mt. Apo.”

Subay niini, gipaklaro ni Agas, nga karong pabiling abli ang pagsaka sa Mt. Apo ilabi na karong panahon sa kwaresma, pahimangno sa mga trekker nga sundon ang  ipatuman nga polisiya.

“Naa tay standardization of unified trekking  and camping policies, ibig sabihin mag set pata og higher standards ang stricter policies  nga  dapat  ituman sa mga trekkers or climbers,” matud pa ni Agas.