Kaso sa dengue sa Davao Region mikunhod atol sa pandemya

Si Engr. Antoneitta P. Ebol atol sa pilot episode sa DOH X1,virtual presser nga Usapang Pangkalusugan: Let's DOH it, BETTER! screengrab via zoom

Nakatala karon og pagkunhod sa ihap sa mga kaso sa dengue ang Davao region itandi sa niaging tuig 2020 subay sa record sa Department of Health (DOH X1) kutob April  30, 2021 .

Atol sa virtual presser sa DOH X1 nga ‘Usapang Pangkalusugan: Let’s DOH it, BETTER! gibutyag ni Control Program Manager, Engr. Antoneitta P. Ebol nga kapin katunga ang gikunhod sa kaso sa dengue sa  tibuok  rehiyon onse.

Sa record sa DOH X1 , tibuok rehiyon onse natala ang  974 ka kaso sa dengue sa tuig 2020  samtang  469 ang natala karong 2021  diin  51.8% ang pagkunhod sa kaso.

Nagpabiling nag una sa ihap ang Davao City nga dunay  487 sa 2020  ug karong 2021 natala ang  372 kon 23.61% ang pagkunhod sa kaso sa dengue.

Samtang sa  Davao de Oro, natala ang 157 sa 2020,  37 karong 2021 ;  Davao del Norte , 151 sa tuig 2020 , 14 karong 2021 ;   Davao del Sur ,45 sa tuig 2020,  8 sa 2021;  Davao Occidental, 125 sa tuig 2020,  34 sa tuig 2021 ug Davao Oriental, 9 sa tuig 2020, 4 karong 2021.

Sumala pa ni  Ebol nga  posibleng dakong tabang ang pandemya sa pagkunhod sa kaso sa dengue sa rehiyon tungod kay sagad residente nagpundo sa balay ug kanunay nga  nagahinlo sa palibot ingon man nabantayan ang mga bata nga nagpuyo ra usab sulod sa balay. 

Apan, bisan pa man sa pagkunhod sa kaso sa dengue, awhag gihapon sa DOH nga dili angay mokumpyansa ug  kanunay manghinlo sa palibot aron batokan ang lamok nga nagdala og dengue.

“Ang mga tao nagpundo sa balay ,  ipadayon gihapon sa mga tao nga batasanon ang  pagpatuman sa  4-S  pagpangita  sa breeding site sa mga lamok nga nagdala og dengue,” matud pa ni Ebol.

Ang  4-S  nagpasabot nga  Search and destroy , Seek early consultation, Self-protection measures, Support spraying/fogging.