Kapin P65M ang pundo sa DSWD-SLP karong 2021

Deparment of Social Welfare and Development (DSWD XI) - Sustainable Livelihood Program (SLP)

DAVAO CITY – Kantidad sa kapin P65 million ang gitaganang pundo sa  Deparment of Social Welfare and Development (DSWD XI) alang sa Sustainable Livelihood Program (SLP) subay sa gipatuman nga Executive Order (EO) 70 ni Presidente Rodrigo Duterte.

Kabahin ang programa sa Regional Task Force (RTF) to End Local Communist Armed Conflict ( ELCAC) diin maka-benipisyo ang mga rebeldeng mibalik sa sabakan sa balaod ug mga katawhan nga nahimutang sa ‘Conflict Vulnerables Areas’ (CVA’s) kon Geographically Isolated and Disadvantaged Areas (GIDA’s) sa rehiyon.

Sa pakighinabi sa NewsFort, gibutyag ni DSWD Social Welfare Officer Florlito Alaba kinsa focal person sa SLP program, “subay sa E.O. 70, dunay duha ka gitutukan nga hatagan og livelihood program, una ang atong gitawag nga former rebels nga mibalik sa sabakan sa gobyerno, ikaduha kadtong CVA’s, mga lugar dunay presensya sa armed conflict kon GIDAs.” Nagsugod ang implementasyon sa programa sa niaging tuig 2020 diin na-atol usab sa pandemic.

“Karong tuig 2021, adunay 1,922 ka former rebels ang gitarget nga maka-benipisyo diin gipundohan og P38,440,00 samtang dunay 90 ka buok nga CVA’s nga gipundohan usab og P27 million,” sulti pa ni Alaba.

Sa karon, wala pa nasugdan ang pag-apod apod sa pundo sanglit naghulat pa ang ahensya og endorsement gikan sa RTF-ELCAC labot sa mga mamahimong beneficiaries karong tuiga.

Matud ni Alaba, “as much as possible sa bulan sa Marso, mahatag na ang endorsement aron masugdan na ang paghatag sa cash assistance.”

Subay sa record sa DSWD X1, sa niaging 2020  adunay mokabat sa 200 ka mga Former Rebels (FR’s)  ang nahatagan og Livelihood Settlement Plan (LSP) diin tag P20,000 cash assistance ang nadawat sa matag  FR.  

Diin ang nahisgutang FR’s gilangkuban sa 12 gikan sa Davao City, 100–Davao de Oro , 37–Davao del Norte, 11-Davao Occidental ug 40 sa Davao Oriental.

Samtang, sa CVA’s  natala ang 39 ka asosasyon sa rehiyon kon 1,088 ka partisipante sanglit usa ka group project ang maong cash assistance, diin  labing taas nga nakuha sa asosasyon kantidad sa P300,000 nga pundo alang sa panginabuhian.

Pasabot pa ni Alaba, “fully implemented na kini karon, more on agri products sa gidas area sama sa banana, abaca, ug dunay general merchandize usab.

“Magpadayon usab ang DSWD sa pagmonitor sa mga gipatumang livelihood program aron masigurong malungtaron kini taliwala karong  panahon sa pandemya.

“Base sa among monitoring, nindot ang dagan sa implementation, mga project nakatabang ug bisan sa pandemic nagpadayon ang ilang operations sa mga livelihood projects,” matud pa ni Alaba  .