Kapin 10,000 frontliners sa DavNor nabakunahan na sa 1st dose, 966 sa 2nd dose

Dr. Rodel M. Flores, DRMC- Chief of Clinics
Usa lang si Dr. Rodel M. Flores, DRMC- Chief of Clinics nga nagpadayag og dakong kumpyansa sa pagbaton og bakuna nga Sinovac. (Photo gikan sa PIA XI)

DAVAO DEL NORTE – Malamposong natapos na sa pagbakuna sa 1st dose ang mokabat sa 10,227 ka frontliners sa probinsya samtang 966 na usab ang nakakuha na og 2nd dose sa bakuna hangtud adlawng martes, April 6, 2021.

Kini subay sa DavNor COVID-19 vaccination update na natala gikan sa  Provincial Health Office (PHO).

Sa record sa PHO, adunay 4,496 ang nabakunahan og Sinovac samtang   5,731 sa AstraZeneca alang  sa 1st dose.

Samtang, ang 966 nabakunahan og Sinovac alang sa 2nd dose.

Target nga frontliners kinsa eligible nga bakunahan sa probinsiya  ning-abot sa 21,996 ug halos katunga na niini ang nakabaton na og bakuna.

Ang mga nahisgutang frontliners naggikan sa  nagkadaiyang  COVID 19 facility sa tanang munisipalidad ug siyudad nga sakop sa probinsya  nga gilangkuban sa Davao Regional Medical Center (DRMC), Davao del Norte Hospital (DDNH) Carmen Zone, DDNH Kapalong Zone, DDNH IGACOS zone, Tagum city, New Corella, San Isidro, Kapalong, Asuncion, Talaingod, BE Dujali, Carmen, Panabo City, Santo Tomas, IGACOS ug PHO .