‘KAAGAPAY Youth Movement’ mugnaon sa DavNor

‘KAAGAPAY Youth Movement’ mugnaon sa DavNor
Gipahigayon ang panagpulong labot kamugnaan sa KAAGAPAY Youth Movement sa Davao del Norte ug paunsa kini ipatuman ngadto sa mga kabatan-onan taliwala karong pandemya. (Photo gikan sa DavNor - PICKMO)

DAVAO DEL NORTE – Gikunsiderang dakong hagit karon sa probinsya ang pag-aghat sa mga kabatan-onan diha sa kalihokan sa pag-panguma, busa gimugna ang KAAGAPAY Youth Movement aron malambigit ang mga batan-on sa programa sa agrikultura.  

Kini subay sa  mas gipalapdan nga  KAwsa sa AGrikultura ug PAnginabuhian sa barangaY (KAAGAPAY)  program diin gilakip na ang sektor sa mga batan-on diha sa programa ni Gobernador Edwin “Kuya Gob” Jubahib  alang sa makanunayong pagbaton og bastanteng pagkaon sa Davao del Norte.

Atol sa gipahigayon nga panagtigum sa hugpong sa kabatan-onan sa probinsya, gibutyag  ni Provincial Sports & Youth Development Office (PSYDO) department head Giovanni Gulanes , “adunay specific instruction si Kuya Gob, nga kinahanglang ilakip ang mga kabatan-onan  sa programa gumikan kay mas lagsik ang mga panglawas niini.“

Matud pa ni Gulanes nga mokabat sa 30%  sulod sa  kinatibuk-ang populasyon sa  probinsya  ang nagpangidaron og 15 hangtud 30 anyos.

Dugang pa ni Gulanes nga kadaghanan sa mga batan-on nahilig sa dula sa internet, nabahin ang atensyon niini sa daghanang kalingawan ilabi na sa social media ug  walay matud pa interes sa panginabuhian.  

Samtang,  gibutyag usab ni  Leonilo Patayon  kinsa hepe sa  Provincial Agriculturist Office (PAGRO) nga  sagad sa mga mag-uuma naa sa pangidarong nga  58 anyos diin nagpasabot  lamang nga  walay  interes sa panguma ang mga batan-on.

Busa,  subay sa   KAAGAPAY  program malaumon ang  mga  opisyal nga  mahatagan og oportunidad ang mga  batan-on sa  panginabuhian pinaage sa pag-panguma. Kahinumduman nga ang KAAGAPAY gilunsad niadtong Hunyo 2020  aron matubag ang panginahanglanon sa  pagkaon  ug  makatabang sa  panginabuhian sa  matag pamilya  sa probinsya  taliwala sa  nasinating  pandemya. (Reports gikan sa PICKMO-DavNor)