Gov Jubahib: Pag-ilis sa electric provider sa District 1, DavNor angay ipa-agi sa peoples assembly o referendum

Davao del Norte Governor Edwin Jubahib
Davao del Norte Governor Edwin Jubahib. (NF Photo)

Giduso karon ni Governor Edwin I. Jubahib ang pagpahigayon og ‘peoples assembly o kaha referendum ‘alang sa posibleng pag-ilis kon pagkambyo og electric provider sa  Davao del Norte .

Matud pa sa gobernador atol sa pakighinabi kaniya sa NewsFort , adlawng lunes, May 3  nga andam siyang mopasiugda sa maong referendum alang sa  kalamboan ug maayong serbisyo sa kuryente sa probinsya.

Dungan niini gi-angkon usab sa gobernador nga nagduso kinig petition ngadto sa Northern Davao Electric Cooperative (NORDECO) kon ang bag-ong DANECO labot sa maong  isyu.

“ Ako ang nag move niini ,  ako ug si Cong Alvarez  ug ang atong mga city ug municipal mayors nga involve sa distrito uno o district one sa atong probinsya  sa Davao del Norte,” matud sa gobernador.

Dugang pasabot sa opisyal,  “dili ni matawag nga privatization kun dili  ang atong gitan aw niini is ang opportunity nga para sa katawhan sa probinsya, tungod kay ang daneco-nordeco since sa una hangtud karon , taas kaayo ang ilang singil sa per kilowatt.”

Daghan mga rason gituki ang gobernador nganong kinahanglan nga kambyohan ang electric provider sa probinsya .

 “Then aduna pay daghang pang problema tungod kay mag request ka magpataod og kuryente, kinahanglang  pang mobudget ang provincial office, kinahanglan pang mobudget ang city office o municipal office ug  kwarta para nga ipalit sa poste ug sa drop wire, so tanang wala gyud silay  investment kung atong tan awon,  naggikan tanan sa congressional office ug sa probinsyal and local government unit  ang tanang budget, “ saysay pa ni Jubahib.

Subay niini, buot sa gobernador nga modesisyon ang katawhan ilabi na sa distrito uno sa probinsya.

“Busa kami ang magpasiugda nga atong e-referendum, e- peoples assembly para ang katawhan ang magdecide kung ganahan pa ba sila sa serbisyo sa NORDECO o  ilisdan na nato og laing  provider,” matud ni Jubahib.

Giklaro sa gobernador nga walay pulitika sa maong lakang ug wala usab syay dapigan kung kinsa nga electric provider sa pag-ingon,  “ ipaagi nato sa bidding,  kung kinsang provider nga kayang maka compete sa mubo nga presyo ug maayong serbisyo , kana atong  pillion para ang development usab mosulod dinhi sa distrito uno sa Davao del Norte.”

Gibarugan sa opisyal nga magpadayon ang ilang petition ug nagfile na usab og cancellation of franchise si Cong. Pantaleon Alvarez ngadto sa kongreso ug  nagduso ang gobernador og kaso ngadto sa Department of Energy (DOE) ug sa National Electrification Administration (NEA).

Kahinumduman nga niadtong April 21, 2021 nga press conference sa NORDECO gisupak na usab nila ang paghimog pribado ug pagbaligya diin gipasi-atab ni General Manager Mario Angelo Sotto nga dili lihitimo ang maong petition nga ilang nadawat sanglit photocopy ug alegasyong dili usab kini mga member consumers owners sa kooperatiba.Nagpadayag ang NORDECO nga andam nilang ipaagi sa proceso kung unsa may mamahimong  abtan  sa maong isyu samtang magpadayon gihapon sa paghatud og serbisyo ang NORDECO ngadto sa gisankopan nga franchise area niini sa Davao del Norte ug Davao de Oro.