Gob Jubahib: ‘BDP resulta sa paningkamot sa gobyerno kontra insurhensya’

Si Gobernador Edwin Jubahib sa Davao del Norte. NF Photo

DAVAO DEL NORTE- Taliwala sa panawagan sa mga magbabalaod nga i-defund ug ihan-ay ang pundo sa National Task Force to End Local Communist Armed Conflict (NTF-ELCAC) program partikular na sa Barangay Development Program (BDP),hugtanong gibarugan ni Davao del Norte Governor  Edwin I. Jubahib nga kinahanglang ihatag kini sa mga angayan nga mga barangay nga dugay na nga nakig-away batok sa mga komunistang grupo.

Sa pakighinabi sa News Fort, adlawng lunes (May 3),  gisulti sa Gobernador nga ang programa sa NTF-ELCAC ilabi na ang Barangay Development Program (BDP) usa ka pagpakita sa malampuson nga paningkamot sa gobyerno nga matapos na ang insurhensya sa mga barangay. 

“Ang BDP, alang kanako, kinahanglan ihatag kini sa mga benepisyaryo sa barangay tungod kay bunga usab kini sa paningkamot sa atong gobyerno nga matapos na ang insurhensya. Kung dili kini mahatag, wala’y pulos ang ilang gisaad sa mga barangay,” matud pa sa gobernador.

Sa Davao del Norte, 23 ka barangay ang nakabenepisyo sa matag P20 million ilalom sa BDP program. 

“Bisan man nga gamay ra ang mga barangay nga benepisyaryo, kinasingkasing ko nga gisuportahan ang programa. Panahon na nga ipakita nato sa mga tawo nga ang atong gobyerno nagtrabaho, ”dugang sulti ni Jubahib. Ang BDP, usa ka timaan nga programa sa NTF ELCAC nga adunay katuyoan nga magdala og kauswagan ug kalinaw sa mga barangay nga kaniadtong dunay presensya sa mga komunistang grupo.
Nasayran nga  822 ka mga barangay sa tibuok nasud ang naidentify nga kanhi dunay prensenya sa  guerilla fronts sa Communist Party of the Philippines – New People’s Army (CPP-NPA-NDF). 

Sa P19 billion total budget sa NTF-ELCAC, P16.5 billion niini ang gitagana alang sa development sa 822 ka barangay nga gideklarang  “cleared” na sa insurhensiya. 

Ang matag recipient nga barangay makadawat og P20 million alang sa: 1-kilometer farm-to-market road nga nagkantidad og P12 milyon; 3 milyon alang sa pagpatukod og classrooms; P2 milyon alang sa water and sanitation systems; P1.5 million alang sa health sanitation ug P1.5 milyon alang sa proyektong panginabuhian.