DQR sms notification alang sa tanang F2 cases gisugdan na

DQR sms notification alang sa tanang F2 cases gisugdan na
Pahibalo from city government of Davao.

DAVAO CITY – Gisugdan na karong adlawa (April 6) ang pagpadala sa SafeDavao QR og sms notification kon mensahe pinaagi sa text alang sa tanang F2 cases.

Una ng gibutyag ni Mayor Sara Duterte nga mas pakusgan pa ang contact tracing sa siyudad ug i-apil na sa pag-test ang mga taong close contact sa kumpirmadong kaso kon gitawag nga F1, ug ang nakaduol sa F1 nga mao ang F2 ug hangtud sa nakaduol sa F2 nga mao ang F3.

Ang pagpakusog ug pagpalapad sa contact tracing gihimo aron malikayan ang pagdaghan sa COVID-19 cases sa dakbayan.

Subay niini nagpagawas og pahibalo ang kagamhanang lokal sa siyudad  aron abisohan ang mga dabawenyo nga kung makadawat sa maong mensahe, mao kini ang kinahanglang buhaton.

Una, mo-adto sa Sta. Ana Health Center para sa libre nga COVID-19 RT-PCR swab test sulod sa ika-5 hangtod ika-14 nga adlaw sugod sa kataposang adlaw nga nakasabay ang nagpositibo.

Ikaduha, sundon lang ang mando gikan sa Sta. Ana Health Center human sa inyong pagpa swab test.

Ug, ikatulo, samtang  gahulat sa resulta, kinahanglan ang istriktong pagpalayo sa ubang tawo. Kung dunay gibati nga sintomas nga ubo, sipon ug kalintura angay nga muadto dayun sa pinaka duol nga District Health Center o sa Barangay Health Center.

Samtang, sa mga tao nga walay sintomas, palihug padayon og self-monitor alang sa mga sintomas nga pwede gihapon mugawas sulod sa katorse ka adlaw.