DavNor ubos na sa MGCQ, curfew hours gipatuman gikan 11:00pm to 4:00am

DavNor ubos na sa MGCQ, curfew hours gipatuman gikan 11:00pm to 4:00am
(Image gikan sa One DavNor Network Facebook Page)

DAVAO DEL NORTE – Halos walay kabag-ohan sa mga health protocol nga gipatuman sa probinsya karon nga ubos na sa Modified General Community Quarantine (MGCQ) gawas lang sa medyo giluagan nga patakaran sama sa curfew hours ug liquor ban.

Subay sa gipagawas nga Executive Order No. 07, series of 2021 ni Governor Edwin I. Jubahib diin nagdeklara na kini sa tibuok Davao del Norte ubos sa MGCQ sugod March 1 hangtud 31, 2021.

Nalakip sa maong kamanduan ang bag-ong oras sa curfew sa probinsya nga gipatuman gikan sa 11:00 PM to 4:00AM, diin niadtong panahon sa GCQ status, istriktong gipatuman ang curfew hours nga 8:00PM to 4:00AM.

Samtang ang liquor ban kon pagpalit og alak karong MGCQ gipatuman gikan 9:00 AM to 6:00 PM, apan bawal gihapon mag inom sa mga publikong lugar sama sa restaurants, cafeterias, bars, ug susamang lugar.

Niadtong  GCQ ang  liquor ban gikan 9:00 AM to 5:00 PM. 

Ubos sa Section 2 sa E.O. pabiling sundon ang General Policies and Guidelines  subay sa pagpatuman sa Community Quarantine sa nasud,  sama sa pagsuot og face mask, face shield sa mga publikong lugar ug istriktong ipatuman gihapon sa mga buhatan sa gobyerno ang “No Face Mask and Face Shield, No Transaction” Policy.

Magpabilin gihapon ang checkpoints sa tanang entry points of Davao del Norte Province ubos sa MGCQ status.  

Limitado gihapon ang kalihukan sa mga tao diin mga dunay lakaw labot  essential goods ug services lang ang tugutan nga mogawas. 

Mga nag edad 10 anyos paubos, ug 65 pataas, mga masakiton, ug buntis gi-awhag nga pabilin gihapon sulod sa balay.  

Magpabililn usab sa 50 porsyento ang gidaghanon sa mga tao panahon nga dunay panagtapok depende sa kadak-on sa venue.

Samtang, mga  hotel ug accomodation establishments  tugutan ng mag operate basta adunay accreditation gikan sa Department of Tourism (DOT) ug mosunod sa mga health protocol. 

Sa samang bahin, padayong awhag sa gobernador ngadto sa katawhan nga dili gihapon mokumpyansa ug padayong mag amping aron malikay sa sakit nga COVID-19. 

Sa pikas bahin, subay sa ulahing COVID-19 update sa Provincial Health Office kutob March 1, 2021, Lunes, ang Davao del Norte nakatala og unom ka bag-ong kaso sa COVID-19 ug 39 ka bag-ong recoveries.

Ning abot na sa kinatibuk-ang 2,869 ang kumpirmadong kaso sa probinsya, diin 2,491 recoveries ug 114 ang namatay.

Sa karon, ning ubos na usab ang aktibong kaso sa Davao del Norte nga dunay 264 active cases.