Acting Mayor Baste Duterte nag-isyu og E.O. 20 labot mandatory swab testing

Vice Mayor Sebastian ‘Baste’ Duterte
Si Vice Mayor Sebastian ‘Baste’ Duterte atol sa programa niini sa davao city disaster radio. (Photo courtesy of Vice Mayor's Office Official Facebook Page)

DAVAO CITY –  Gimando karon  ni Acting Mayor Sebastian “Baste” Duterte ang mandatory swab testing sa tanang close contacts, lakip na second ug  third generation contacts, isip kabahin sa mas gipakusgan nga stratehiya  sa kagamhanan sa siyudad aron mapugngan ang pagkatag sa COVID-19.

Subay sa Executive Order (EO) No. 20  nga  gipirmahan sa Acting Mayor niadtong April 6, 2021 ug molungtad kini hangtud sa December 31, 2021,  nagkanayon nga mandatory ang swab test sa tanang close contacts  taliwala sa pagsaka sa COVID-19 cases sa National Capital Region (NCR).

Matud pa ni Acting Mayor Baste, mga tao nga close contact sa pasyenteng nag positibo kon F1, ingon man “second generation” kon F2 kinsa direct contact sa F1, ug ang “third generation” kon F3 kinsa close contacts sa F2, kinahanglang ipailawom sa swab testing.

Gikatakda usab nga ipang-iskedyul sa contact tracing team kon sa district health office ang mga ipa-ilawom sa Reverse Transcription-Polymerase Chain Reaction (RT-PCR) test.

Una niini, nagpadayag na usab si Mayor Sara Duterte nga magpatuman og surveillance swabbing sa mga high-risk areas ug hugot nga pag-monitor sa mga taong dunay influenza-like illnesses sa komunidad.

Ang Mayor kasamtangang ubos sa upat ka adlaw nga medical leave human nga tua kini sa Singapore alang sa “personal health management gikan  April 6 hangtud April 10.