84th Araw ng Dabaw saulogan karong March 1, holiday posibleng ideklara

84th Araw ng Dabaw saulogan karong March 1, holiday posibleng ideklara
(Image courtesy of Araw ng Dabaw 2021 Facebook Page)

DAVAO CITY – Giduso na ni Mayor Sara Duterte ngadto sa kagamhanang national ang posibleng pagdeklara nga special non-working holiday karong March 1, 2021 subay sa pagsaulog sa ika-84 nga Araw ng Dabaw.

“Sa pagkakaron naa pa nato ang papers para sa March 1, special non working holiday ang atong gi-request, because ang Araw ng Dabaw is March 1, mao na atong gina aplayan og holiday.” sumala pa sa Mayor atol sa programa niini sa Davao Disaster Radio, adlawng lunes, February 22, 2021.

Pasabot ni Mayor Sara nga sa niaging mga kasulogan sa Araw ng Dabaw, duha ka holiday ang nahitabo, sa March 1 ug March 16 apan nag-ingon na ang kagamhanang national nga dili na mahimo karon nga himuon duha ang holiday sa usa ka selebrasyon. 

Sanglit subay sa rekomendasyon sa National Historical Commission, opisyal nga kamugnaan sa siyudad sa Davao sa petsa March 1 ug dili March 16.

Busa, karong adlawng  lunes, magsaulog  ang siyudad sa maong okasyon  diin  online ang mga aktibidad.

Sumala ni Mayor Sara, “ang face to face lang  nato  mao ang flag ceremony  ug  misa palasamat  apan  kini tambongan lang sa  limitadong  ihap sa mga government official .”

Sanglit pandemya gihapon, malaumon ang Mayor nga mosalmot ang mga dabawenyo sa gi-andam nga aktibidad sa City Tourism Office nga makit-an sa facebook page niini nga  https://www.facebook.com/Arawngdabawofficial/