323 na-swab test na sa Davao de Oro human dunay kaso sa UK variant

323 na-swab test na sa Davao de Oro human dunay kaso sa UK variant
(Photo gikan sa Province of Davao de Oro Facebook Page)

DAVAO DE ORO – Ningkabat na sa 323 ka mga indibidwal ang gipailawom sa swab test sa probinsya partikular na sa Compostela ug New Bataan human nga nakabaton og duha ka kaso sa B.1.1.7 kon UK variant sa COVID-19.

Gipahigayon ang swab test niadtong February 16, 2021 ug gipaabot na lang karon ang resulta sa bisan adlawa gikan karon.

Sa niaging semana gikumpirma sa Deparment of Health (DOH) nga dunay tulo ka positibo sa UK variant sa Davao Region  diin duha niiini taga  Davao de Oro, busa gilayon nga girespondehan sa Emergency Operation Center  (EOC) sa Compostela ug New Bataan  ang  hugot nga contact tracing. 

Sa gipagawas nga pamahayag pinaagi sa Province of Davao de Oro facebook page,  dili lamang mga F1 o close contacts sa mga pasyente nag positibo sa UK variant  ang gipang-isolate ug gi-swab test, apan  apil na sad ang mga F2 o close contacts sa F1 ug  F3 kon close contacts sa mga F2.

Ang maong lakang gipatuman, tungod kay nasayran nga  ang  bag-ong variant sa COVID-19 gituohan nga paspas mukatag ug makatakod busa  gipakusgan sa COVID-19 EOC ang  paningkamot pa sa contact tracing aron mapugngan ang pagbaton pa og laing kaso sa UK variant sa probinsya.

Padayong pahinumdum sa probinsya ngadto sa publiko  nga batasanon ug timan-an ang  BIDA Solusyon kontra COVID-19 diin nagpasabot:

B -awal wala’y mask; 
I – sanitize ang mga kamot;
D – istansya’g usa o duha ka metro;
A – lamin o sayron ang tinuod nga impormasyon.